दुई जोडी स्रष्टालाई स्वयम्बर सहित सम्मान

 

‘सयपत्री प्रतिष्ठान’ काभ्रेले महाकवि लक्ष्मीप्रसाद देवकोटाको ११३ औँ जन्म जयन्तीको अवसरमा ‘सयपत्री राष्ट्रिय सम्मान २०७८’ कार्यक्रम सम्पन्न गरेको छ । शनिबार जनज्योति मा.वि. भवनको सभा कक्षमा सम्पन्न कार्यक्रममा विभिन्न स्रष्टाले रचनावाचनसमेत गरेका थिए ।

प्रतिष्ठानले यस वर्ष साहित्यकारका र साहित्यमा लाग्न सहयोगी जीवनसाथीलाई समेत दोसल्ला ओढाएर सम्मानित गरेको छ । सम्मानित हुनेमा गङ्गा सुवेदी र उनको श्रीमान् दिनेश सुवेदी, सूर्यप्रसाद लाकोजू र श्रीमती सविता कुमारी लाकोजू श्रेष्ठ दुई जोडी स्रष्टालाई सम्मान गरेको हो । आफ्नो जीवनसाथी एकले अर्कोलाई दुबोको माला पहिराई सफल दाम्पत्य जीवनको रूपमा पुनः स्वयंवर गर्ने अवसरमा सबैले ताली बजाएर साथ दिएका थिए । उनीहरूलाई सगुन स्वरूप फलफूल र मसलाहरू प्रदान गरिएको थियो ।

‘सयपत्री राष्ट्रिय सम्मान पत्र २०७८’ साथ बाटो खर्चको रूपमा नगद ५ हजार रुपैयाँ सहित सम्मानित गरिएको थियो।

वरिष्ठ साहित्यकार मोहन दुवालको सभापतित्वमा आयोजित कार्यक्रममा प्रमुख अतिथि नेपाल प्रज्ञा प्रतिष्ठानका सदस्य सचिव वरिष्ठ साहित्यकार प्रा.डा.जगत प्रसाद उपाध्याय थिए । कार्यक्रममा वरिष्ठ लेखक तथा साहित्यकार श्रीओम श्रेष्ठ रोदन, साहित्यिक पत्रकार महांसघका वरिष्ठ उपाध्यक्ष मातृका पोखरेल, उपमहासचिव चेतनाथ धमलालगायतले मन्तव्य व्यक्त गरेका थिए भने विभिन्न १३ जना स्रष्टाहरूले आ–आफ्नो रचना वाचन गरेका थिए।

प्रमुख अतिथि प्रा.डा. जगप्रसाद उपाध्यायले दुई जोडी स्रष्टा सम्मानित गर्दै सयपत्री प्रतिष्ठानले उपयुक्त पात्रहरू छनौट गरेको बताए । उनले स्रष्टाहरूको साहित्यिक योगदानमा जीवन साथीको उल्लेखनीय योगदान रहने हुनाले दम्पत्तीसहित सम्मानित गर्ने परम्परा सही भएको र आफूलाई निकै प्रभावित भएको बताए।

मोहन दुवालले साहित्यकार एवं साहित्यिक संस्थाले कुनै पनि वादमा नलागी जनताको लागि सेवा गर्नुपर्ने कुरामा जोड दिए । गङ्गा सुवेदीले सयपत्री राष्ट्रिय सम्मान पाउँदा आफूलाई ४० वर्षअघि आफ्नो विवाहको स्मरण गर्दा भावुकतामा उनका आँखा रसाएका देखिन्थे ।

सम्मानित साहित्यकार सूर्यप्रसाद लाकोजूले यो सम्मानले आफूलाई थप जिम्मेवार बनाएको र सामाजिक रूपमा आफ्नो अक्षरकर्म लागि रहन प्रेरणा मिलेको बताए।

कार्यक्रममा सम्मानित स्रष्टाहरूको व्यक्तित्व र कृतित्वका बारेमा वरिष्ठ साहित्यकार श्र ओम श्रेष्ठ “रोदन“ले प्रकाश पारेका थिए भने सयपत्री प्रतिष्ठानका अध्यक्ष राजेन्द्र श्रेष्ठले सयपत्री राष्ट्रिय सम्मानका बारेमा जानकारी दिएका थिए भने प्रद्युम्न न्यौपानेले सयपत्री प्रतिष्ठान जनगालको संस्थाको गतिविधि बारे प्रकाश पारेका थिए ।

000

https://sahityapost.com बाट साभार